مسيلمة يكتب تاريخ المدينة بقلم الشاعر عصام سامي ناجي

مسيلمة بيكتب تاريخ المدينة

الليل أكيد طول
فعيد القصة م الأول
وسمع إللي إرتضى
لسة الشروخ في القلب
محتاجه للفضفضة
محتاجه الجميع يفهم
إن الدروب موصده
وطريقنا صعب أكيد
والفجر لسه بعيد
وحتي الظلام قدامنا
ما بيملش من التهديد
****
فك الطلاسم
وإبتدي تحليل
وأبعت رسالة للفرات والنيل
أوطانا ضايعه للاسف
أوطانا كمان تاهت
والصبح أصبح باهت
عاجز كده وعليل
فبإيه يفيد الكلام
كل الكلام متعاد
فوق القلوب بصمة الجلاد
بيمسح في التاريخ ويزيل
****
بيع المبادئ للاسف
أصبح بكل وضوح
والبسمة رافضه تقترب
م الروح….
عيونا بتبص حزينة
ومسيلمة الكذاب
بيكتب تاريخ المدينة
وأدي الطوفان أعمى
وبيحطم قلوع السفينة
****
كل أنتصارات العرب
في عصرنا سكه
مش فخر ياحجاج
إنك تحاصر مكة
مش فخر إنك تحطم
في شموخ بغداد
وتبيع دمشق للعدا
في مزاد….
مش فخر أبدا
دا مبدأ الأوغاد

عصام سامي ناجي